O pasado martes FADEMGA FEAPS GALICIA acolleu a primeira charla de aproximación ao proxecto de Dinamización Asociativa promovido por FEAPS, que este ano se desenvolverá en Galicia.

 

14 entidades da discapacidade intelectual galegas interesáronse neste proxecto que foi presentado por Carlos Pereyra - Técnico de Formación de FEAPS Confederación - e que nace para promover nas asociacións un ambiente de participación e intercambio de experiencias que favorezan a implicación de cada un dos integrantes do movemento asociativo.

 

Segundo palabras de Carlos Pereyra, a Dinamización Asociativa pretende "aumentar a participación e o sentido de pertenza dos socios. Debemos traballar para crear unhas entidades máis vivas e activas, que coñezan mellor aos seus socios, cales son os seus intereses e como poden colaborar coa súa asociación". A presenza social das asociacións será outro dos puntos fortes do programa de Dinamización "as entidades teñen que darse a coñecer na súa contorna, ser máis abertas e estar menos centradas en si mesmas".

Durante os próximos meses, as asociacións interesadas en adherirse a esta iniciativa comezarán a deseñar o plan de Dinamización Asociativa da súa entidade para a súa posterior implantación, "Imos pór en marcha unha metodoloxía baseada na xestión por procesos. As principais áreas sobre as que comezaremos a traballar serán a mellora da comunicacion (tanto interna como externa), a implicación dos socios e o fomento do sentido de pertenza. O fin é aprender uns doutros e coñecer os diferentes enfoques das entidades que moitas veces traballan moi illadas, sen interaccionar con outras asociacións da súa contorna".

O Proxecto de Dinamización Asociativa que chega agora a Galicia nacía na Federación de Castela e León, e xa se implantou noutras Federacións españolas como Murcia, Valencia, Asturias, Estremadura e Castela a Mancha.